Miniseri : Kisah keluarga Om Kalo dan Tanta Onya (seri 5-CERDAS CERMAT ANTAR KAMPUNG)

Hodohh!!!...maaf for samua yg suka deng miniseri "Kisah Keluarga om Kalo deng Tanta Onya" bukan maksud so nemau taruh depe lanjutan kasiang, mar memang so lupa akang, untung ada salah satu penggemar (miniseri ini, bukang kita pe penggemar, hehe) yg sindir alus, deri kita so sengaja bekeng lupa kata....Untuk Manadoners...napa dang, silahkan nikmati kong brenti ba veto nech? :))

CERDAS CERMAT ANTAR KAMPUNG

Pagi-pagi hari minggu, seperti biasanya sebelum smokol campur pa tanta Yeni pe warong, tanta Onya salalu urus depe taman kacili di muka rumah. Pokoknya mulai dari cabu tu rumpu-rumpu alus yang rajin skali bartumbuh ganggu depe bunga-bunga, sampe sirang dengan kasih sayang tu depe bunga anggrek, bunga aster, terutama tu tanta Onya pe bunga anggrek itam, yang dia dapa pe stengah mati skali di utang Papua waktu ada pasiar ka sana pa Om Kalo pe anak basudara.

Depe perjuangan waktu ada bacari tu anggrek langka itu memang for Tanta Onya takkan terlupakan seumur hidup. Terutama waktu tu anggota separatis di utang Papua datang so deng senapan rupa om Utu jaga pake batembak babi utang. Tanta Onya kwa riki totofore sampe di ujung rambu, mar dorang langsung lapas pa dia sarta dorang dapa tau kalu tanta Onya orang Manado.

Bulum lagi deng persoalan dengan dinas kehutanan, tanta Onya sempat barmain paka-paka sambunyi deng petugas jaga di batas utang, soalnya tu spesis anggrek itang itu kan di lindungi, bukannya tanta Onya nentau itu, cuma depe gila suka skali batanang bunga, apalagi bunga anggrek, bekeng dia nekat. Makanya sampe skarang, tanta Onya bertekad untuk kase berkembang biak tu tanaman langka itu. Waktu pertama kali tanta Onya pe anggrek itang itu babunga, 1 x 24 jam tanta Onya baforo di muka anggrek, kurang om Kalo ada sirang deng aer dingin di muka, baru tanta Onya takage dari depe acara ‘mengagumi tanaman bunga’ – nya.

- Pagi Onya !! – suara orang basalam bekeng Tanta Onya takage jaha, soalnya dia sementara asyik melamun. Noh bayangkan jo kalu da sementara tahaga-haga kong orang datang bekeng kage jaha-jaha.

- Adodoh eh !! pagi Ungke, ngana ini bekeng kage orang jo !! jang bagitu kwa, bae le kita nyanda ada panyaki jantong !! – tanta Onya mulai bafeto.

- Adoh Onya jangang marah dang, kita so tiga kali da kase selamat pagi, ngana cuma acuh, makanya kita kase kuat ta pe suara. Sorry dang, - om Ungke minta maaf, dia le so gugup dapa lia tanta Onya pe muka so jadi putih rupa kapas baru pete dari pohong.

- Adoh torang dua ini, hari minggu kong masih pagi-pagi so bakufeto, apa kabar ini dang Ungke ? tumben pagi-pagi so tasopu kamari ?! – tanta Onya pe suara jadi manis ulang, maklum, tanta Onya kwa paling pantang marah-marah di hari minggu bagini.

- Kita kwa ada perlu pa ngana Onya. Bagini, ngana kan ketua seksi pemberdayaan SDM pa torang pe kampung, kita kalamaring sore ada dapa undangan lomba

cerdas cermat antar kampung tingkat kecamatan. Kita mo minta ngana pe pendapat, menurut ngana torang mo iko ato nyanda, Nya ? – om Ungke menerangkan panjang lebar.

- Kalu kita sih mo lia dulu dari depe segi positif, sebagai ketua seksi pemberdayaan SDM di kampung, menurut kita itu lomba semacam itu bagus, yah rekeng-rekeng for asah otak, lah !. Mar yang kita mo cari tau, itu for orang-orang umur brapa, Ungke ? – tanta Onya mulai berteori.

Kalu di kampung sablah, dorang pe kuntua musti sebut dengan sebutan ‘Pak Kuntua’ tiap kali bicara deng dia, mar om Ungke kan ‘low profile’, biar dia so tapilih jadi kuntua, orang musti pangge pa dia rupa dulu, cumu depe nama. Itulah depe untung dapa kuntua ‘low profile’, nyanda ada yang berubah, beda deng tu kuntua di kampung sabalah, baru abis tapilih, hele bajalang mar nemau ba tengo ka tanah.

- Dari yang kita baca di surat undangan, itu terbagi for 3 kategori, kategori anak, kategori remaja/pemuda, deng kategori dewasa. Bagimana menurut ngana pe pendapat ? – om Ungke batanya pa tanta Onya.

- Bagini Ungke, for kita, lebe bae torang tempel tu surat undangan di papan pengumuman balai desa, sekalian taruh keterangan for calon-calon yang mo mendaftar, harap ke bagian administrasi. Nanti dari samua calon² itu, torang akan seleksi ketat yang mo pigi bertanding. Masih brapa lama sebelum lomba itu, Ungke ? -

- Torang masih ada waktu 3 bulan for persiapan, Onya. Jadi bagitu jo dang ? kita mo bilang pa tanta Yulin*, supaya basadia trima calon. Menurut ngana Onya, torang ada kans mo untung ? – om Ungke ragu-ragu, soalnya kasiang dia jaga perhatikan tu depe rakyat di kampung, pe banyak IQ maruku, terutama tu depe tua-tua. Bagimana om Ungke so bekeng akang perpustakaan di balai desa, dorang cuma manyao : ‘ itu kwa cuma for anak² yang masih skolah, torang-torang ini yang so tua so balajar banyak lewat pengalaman !’. Yah, om Ungke terpaksa langsung tutu mulu, so nembole manyao banyak. Jadi tu dorang pe perpustakaan cuma anak-anak skolah tu jaga baforo di sana.

- Kalu bagitu, kita ley somo basiap kumpul tu bahan-bahan for test. Adoh kasiang mo saki ini ontak !! – tanta Onya so mengeluh baru mo bapikir tu karja yang dia musti beking.

Biar busu-busu, tanta Onya itu pernah injang bangku kuliah, sampe semester 3. Yah, maar so bagitu, rupa tu oma-oma bilang, kalu cinta so datang, butyaa tu matyaa !! so bagitu yang da jadi deng tanta Onya. Pe berkenalan deng om Kalo, tanta Onya langsung ba bacao. Depe laste, tanta Onya pe Ajus deng Sebe so pastiu, dorang langsung pi maso minta pa om Kalo, memang kwa so tabubale tu dunia, bae le om Kalo pe Ma’ deng Pa’ setuju, tu cirita jadi lancar-lancar. Skarang tanta Onya baru manyasal, bukang manyasal kaweng deng om Kalo, mar manyasal dulu berenti kuliah. Tu rasa mangiri di hati jaga datang, apalagi kalu so dapa lia

tanta Ola si ‘business woman’ so lewat deng depe oto mo pi kantor, memang tanta Onya rasa mo maleleh, dapa lia kwa pe pasung skali, mandiri, nyanda tagantong pa paitua, pokoknya tu ‘wanita ideal’ menurut tanta Onya, noh so tanta Ola itu ! skarang tanta Onya musti kumpul bahan test, tu otak so mulai jaga bakarat kasiang, so lama bukang tanta Onya meninggalkan bangku kuliah, mulai dari itu, dia cuma jaga buka-buka Keke pe buku for bahoba kalu depe Keke ada bekeng PR ato nyanda. Nyanda pernah talebeh dari itu.

Baru tanta Onya deng om Ungke tampal tu surat undangan deng pengumuman pendaftaran calon. Depe sore so satu tambung tu da datang mendaftar pa tanta Yulin. Om Ungke riki taherang-herang. Dia nyanda sangka kalu depe masyarakat pe antusias skali bagitu. Om Ungke nentau stengah mo mati, kalu tanta Onya so pi ba ober pa ‘ The Queen of Karlota’ si tanta Reni, kalu di lomba nanti, tu peserta mo maso televisi. Noh, tau sandiri kalu ada cirita sampe pa tanta Reni pe talinga, nyanda rekeng tiga depe sasadiki orang satu kampung so tau, kalah kalu Cuma SMS deng Facebook pe kecepatan bakirim.. Sapa nemau maso televisi ? tu orang-orang di kampung pe pikiran, biar sube’-sube’, kalu so tua kamari boleh mo bacirita pa cucu, Opa ato Oma pernah maso televisi dulu. Apalagi kalu untung lomba, dapa piala, dorang mo pajang di balai desa, kong boleh mo basombong akang, kita itu yang da dapa tu piala. Pokoknya so bermacam pikiran mulai dari yang biasa-biasa jo sampe yang muluk-muluk so muncul tentang persoalan maso televisi itu.

Bahkan si Angela, anaknya tanta Kalista deng Mister Opo yang pe pasung skali (maklum indo !!), dia kan bercita-cita mo jadi top model internasional, mar Mister Opo nyanda kase lantaran si Angela kata musti klaar depe skolah dokter baru boleh berlenggak-lenggok di catwalk. Angela pe nafsu dalang hati memang nya’ dua. Dari pi tunggu akang jo, nanti so kerepo tu muka baru depe dokter dia dapa, lama bukang skolah dokter, blum mo bakurekeng deng tu stress balajar. Pas dia pe dapa tau tu lomba mo dapa syuting TV, nyanda pake pikir panjang, dia langsung pi mendaftar pa tanta Yulin. Dia pikir, sapa tau ada pencari top model yang dapa lia pa dia kong pangge pi Paris ? rupa Claudia Schieffer kan dulu bagitu ?!! demikian Angela pe angan-angan.

Akhirnya, setelah seleksi yang cukup ketat deng susah, tu peserta yang mo di utus dari kampung om Kalo deng tanta Onya dorang so dapa. Di kategori anak-anak, tanta Onya nyanda dapa kesulitan yang berarti, soalnya tu anak-anak kacili ber-IQ tinggi, banya pa dorang sana, riki bingo mo pilih. Jadi yang mo pigi, tanta Ola pe anak, si Remon, om Emil pe anak, si Nadia, deng pilihan spesial, si Caloutje, anaknya tanta Kalista deng Mister Opo yang paling bungsu. Sebenarnya si Caloutje nyanda maso hitungan untuk tingkat IQ, mar gara-gara tanta Mien pe argumentasi, samua nyanda berkutik. Tanta Mien bilang, so musti kase maso pa Caloutje, dorang samua di rapat haga herang pa tanta Mien, kong depe laki om ungke tanya dari kiapa, tanta Mien manyao ; ‘ dia kan jago bahasa Inggris si Caloutje itu !! ‘ kong waktu tanta Onya tanya apa depe alasan bilang bagitu,

soalnya dari dulu si Catoutje kan nyanda pernah dapa dengar dia bicara pake bahasa Inggris, tanta Mien cuma manyao kalem ; ‘ dia kan bule pe anak, ngoni lia tu bule-bule pe jago inggris !! ‘Ya do’ do’…pa tanta Mien dang, dia pe kira samua bule stou bicara pake bahasa Inggris. Maar lantaran hormat pa om Ungke, dorang kase biar tanta Mien pe mau itu, yang paling penting ada Remon deng Nadia, dorang dua itu kan yang bertindak sebagai ‘pemikir’.

Dari kategori pemuda/remaja, yang dapa utus si Keke (tanta Reni sempat bagosip, kalu si Keke jawab banyak yang butul dari depe Mama yang susun tu soal test, kong so kase tau pa Keke, bae tanta Onya nyanda dapa dengar tu gosip, bagini kwa tanta Reni pe testa mo kanal ulang tu tanta Onya pe solop nileks !!), si Eva, anaknya tanta Reni, deng si ‘little’ Ungke, anaknya om Utu deng tanta Lena.

For kategori dewasa, so yakin dan pasti ada tanta Ola, om Ody deng om Utu. Sebenarnya om Abe yang mo duduk di kursinya om Utu, mar lagi-lagi tanta Mien sang ‘penindas laki’, bilang musti om Utu yang pigi, soalnya om Utu jago bahasa Inggris kata !! padahal waktu da test, om Utu pe jawaban cuma satu tu butul, yaitu pertanyaan tentang bahasa Inggris. Waktu dorang ada ambe keputusan itu, tanta Onya deng om Ungke lagi nyanda ada di rapat, dorang dua lagi ke kantor kecamatan for kase maso tu doi partisipasi. Nanti tanta Onya dapa tau, mar so terlambat. Memang tanta Onya pe nafsu so sampe di solop pa tanta Mien itu.

Hari ‘H’ akhirnya tiba. Nentau kiapa, samua orang satu kampung so gugup. Untuk kase semangat pa dorang pe team, samua orang kampung bakumpul di balai desa.

- Adoh kasiang coba kaluar dulu ngoni, napa ini om Utu pe dasi so basah deng suar ehhh !!!!!!! – tanta Mien bafeto-feto, soalnya so pe sesak di dalam balai desa, lantaran tu manusia so satu tambung da maso ka dalam.

- Tanta Mieeennn, mana tu semengken di sini ???? – kali ini tanta Ola pe suara yang da dape dengar pe kuat. Tanta Mien yang di tugaskan jadi ketua seksi ‘sibuk’ langsung taputar-putar kasana-kamari cari tu semengken.

- Tanta Mieeenn, napa kita pe calana panjang depe gonop so ciriii !!!!! – suara-nya si Toar bataria dari dalam kantor om Ungke.

- Tanta Mieennnn, kita pe sanggul palsu jatuuunggg !!!!!! – Eva bataria stengah manangis.

- HOIIIIIIIIIIIIIIIII !!!!!!!!!!!! KITA PE TANGAN CUMA DUAAAAA !!!!! – samua orang di balai desa langsung tadiang, memang tu suasana dari tadi pe hiruk-pikuk, langsung jadi sunyi lantaran tanta Mien bataria panik campur kalap.

Akhirnya, samua selesai. Rombongan langsung berangkat setelah berdoa singkat yang di pimpin oleh dorang pe pendeta baru, yang masih nyong-nyong, deng fasung skali.

Selama rombongan di tampa lomba, samua di kampung nyanda berenti-berenti berdoa, bahkan om Odo sampe pake acara manangis, dorang pe kira lantaran da memohon dengan sungguh-sungguh, nentau katu depe panggulu di kaki dorang dapa injang lantaran tu manusia so baku ruju di balai desa.

Dorang pe penasaran mo suka lia di TV, mar itu siaran bukang langsung, dorang rekam kong nanti minggu depan depe penayangan. Jadi samua berela-rela tunggu tu rombongan pulang.

Pas jam 11 malam, rombongan utusan kampungnya om Kalo pulang. Dari atas oto Trek yang om Odo da kase pinjam akang, turun pêserta kategori anak-anak, dorang pe muka berseri-seri, memang riki tarang tu balai desa deng tu anak tiga pe senyum lebar sampe di talinga. Dorang dapa juara pertama.

Abis itu, muncul peserta kategori pemuda remaja, samua senyum lebar mar nyanda sampe di talinga, soalnya dorang kwa cuma dapa juara kadua.

So lama tu utusan kategori remaja/pemuda da turung, tu kategori dewasa bulum dapa lia dorang pe lobang-lobang idong.

- Utuuuu !!! turung jo kamari !!!! – tanta Lena pe suara dapa dengar stengah baancam.

Om Utu lantaran okat pa tanta Lena, dia turung palang-palang dari oto trek, menyusul tanta Ola deng om Ody, maruku dapa lia malo, mar kalu jaga batengo pa om Utu, dapa lia sama deng dorang rasa-rasa mo talang malintang pa dia itu.

- Onya, kiapa kong dorang tiga pe model bagitu ? – om Kalo batanya pa depe bini penasaran. Soalnya dia kan nyanda iko, cuma boleh tu yang ‘bersangkutan’ maso di tampa lomba.

- Gara-gara Utu kong torang kalah, Kalo. – jawab tanta Onya babise.

- Hah ?!! itu kwa tu tanta Mien pe gatotel, kase iko pa Utu cuma lantaran Utu jago bahasa Inggris !! – om Kalo so taiko banafsu.

- Tantu jo itu dia jawab samua salah ?!! – sambung om Kalo.

- Torang so amper untung sebenarnya, mar pas di pertanyaan terakhir, kalu nyanda jawab, tu nilai kurang 1, kalu salah jawab, tu nilai kurang 10. Adoh kwa Kalo, pe gampang skali tu pertanyaan, Utu pi laju-laju manyao nyanda pake berunding !! – tanta Onya dapa lia manyasal skali.

- Apa so tu pertanyaan, Nya ? – om Kalo penasaran

- Tu pembawa acara kase soal ; ‘ Apa nama yang di berikan bagi orang yang tidak makan daging ? ‘ ngana tau dia pi manyao laju² :

‘ORANG MISKIN !!’

Ya dodo’ pa om Utu daaang !!!!!……………….

* Tukang ‘ketik’ di kampung alias administrasi – lht seri 3

Miniseri : Kisah keluarga Om Kalo dan Tanta Onya (seri 5 : SI KEKE)

Halo samua...posting seri 5 dari Kisah Keluarga Om Kalo & Tanta Onya ini, bacirita tentang dorang pe anak sayang2 si Keke, juga tentang Om Kalo pe keluarga di masa lalu..

SI KEKE

Sayup-sayup dari dalam kamar pa Keke, dapa dengar lagu-lagu manis dari grup musik Michael Learns to Rock yang punung deng kata-kata cinta mendayu-dayu. Sementara itu di ruang tamu, om Kalo deng tanta Onya sementara asyik dudu bauni televisi. Mendadak tanta Onya babuka suara.

“ Kalo, ngana ada perhatikan bae-bae pa Keke akhir-akhir ini ? “ tanta Onya batanya. Om Kalo pe mata masih turus tatanang di televisi, mar dia manyao depe bini pe pertanyaan.

“ Nyanda, Onya. Kiapa, ada yang nyanda beres pa Keke ? “

“ Bukangnya ada yang nyanda beres, mar kita perhatikan so satu minggu ini, Keke tinggal ada putar lagu sama turus, riki kita manusia pe paling biongo bahasa Inggris ini mar hafal deng itu lagu ‘paint my love’, kira gampang !! “

Om Kalo langsung haga herang pa dia pe bini dapa dengar samua itu, dia bukang herang dapa dengar Keke putar lagu sama turus, mar herang dapa dengar tanta Onya bilang tu ‘paint my love’ dengan lidah pe fasih skali. Soalnya depe bini itu, tiap dia mo coba cumu kata² yang pake bahasa inggris, salalu dia salah cumu orang pe fam.

“ Kiapa ngana haga pa kita deng mata somo tacabu bagitu, Kalo ?! “

“ E..ee..nyanda Onya, kong kiapa so deng Keke ? “ om Kalo berusaha mengalihkan pembicaraan.

“ Kita rasa, torang pe Keke lagi jatuh cinta, Kalo. Adakali kita lia, Keke senyum-senyum sandiri, tatawa sandiri, tahaga-haga rupa orang bogo-bogo ! “

“ Bagimana ngana tau kalo Keke lagi jatuh cinta, Onya ? boleh jadi ngana pe anak itu so mulai dapa panyaki bingo-bingo !! “ baru om Kalo klaar cumu tu kalimat, bantal kadera so malayang pa depe kapala.

“ Eh ngana ini Kalo sambarang bicara, biar bagitu itu ngana pe anak ! kita ini bicara serius !! “ tanta Onya so mulai bamarah. Dapa lia depe bini pe muka so mulai bengko, om Kalo langsung babuju sayang-sayang, mar stengah baterek.

“ Adoh Onya, ngana dapa lia lebe pasung eh kalu bekeng muka broot bagitu…”

“ Kalo….!! “ ancam tanta Onya, mar kali ini so bukang bantal kadera yang ada pa depe tangan, mar so asbak rokok.

“ Iyo dang Onya, kita mo stop baterek pa ngana ! skarang bicara serius dulu tentang Keke. “ om Kalo jadi ciut juga dapa lia tu asbak rokok. Dari kalo tu asbak malayang di ontak, memang langsung tandu sapi kwa’ kaluar deng sukses !!

‘’ Kita so tau sapa tu Keke pe Romeo, Kalo ! ‘’ lanjut tanta Onya serius. Dapa dengar samua itu, om Kalo biar dia sebenarnya nyanda tertarik deng depe bini pe percakapan ( banyak laki² yang pikir kalo tu urusan mendidik anak, itu cuma bini pe karja ), mar lantaran inga² tu asbak rokok tadi, dia iko-iko aros. Om Kalo lalu batanya pura² tertarik,

‘’ Sapa tu Keke pe pujaan hati, dang ?! ‘’

‘’ Si Toar, Tole’ pe anak. ‘’ tanta Onya manyao palang-palang, dari dia nemau Keke dapa dengar dorang sementara ada bicara tentang anak itu. Tanta Onya pe suara yang memang volume-nya so paling minimum itu, dapa dengar rupa ledakan bom pa om Kalo pe talinga.

‘’ Apa ngana bilang, Onya ???? Tole’ pe anak ???????? ‘’ om Kalo bataria stengah kalap. Tanta Onya riki takage jaha-jaha dapa dengar om Kalo bataria rupa kaki saribu baru gigi di panta.

‘’ Aduh rekey, Kalo’ !! palang² sadiki…..’’ tanta Onya bulum klaar bicara, om Kalo so baangka capat² dari kadera, kong langsung pigi batoki pa Keke pe pintu kamar. Baru Keke buka tu pintu, plaaaaak !!!!! om Kalo pe tangan kanan langsung malayang pa Keke pe pongo-pongo.

“ Keke, mulai hari ini Papa nemau dengar ngana berhubungan dengan itu Tole’ pe anak, awas sampe Papa dapa dengar ngana dengan dia bakudapa, bukang cuma lima jari ngana mo tirima !! “ ancam om Kalo. Si Keke yang nentau judul dan sebab sampe dapa tampeleng langsung manangis babanting di pa depe tampa tidor. Om Kalo babale dudu di kadera dengan napas masih tahela-hela lantaran marah. Tanta Onya sandiri nyanda mangarti dengan om Kalo pe reaksi. Tanta Onya pikir, om Kalo nyanda suka Keke batona, lantaran Keke masih kacino.

“ Kalo, kalu ngana nyanda suka Keke batona, ngana boleh bilang bae-bae pa dia, bukang langsung main tampeleng bagitu ! “ palang-palang tanta Onya bicara pa depe laki. Dia sandiri so tako mo basuara dapa lia om Kalo pe model tadi yang so rupa Arnold Schwazeneger di film Terminator, pe kejam skali do’en ada tampeleng pa Keke, tanta Onya tako mo basuara lebe karas, jang kage kong Terminator kase ley pa dia tu lima jare sablah, bukang soe ?!

‘’ Bukang itu depe persoalan, Onya. Kita bukang marah Keke batona, dari kita sandiri so lewat tu masa remaja rupa Keke ! ‘’ om Kalo manyao pa tanta Onya. Tanta Onya pe kening langsung mengkerut rupa ‘kukis bodok’ salah goreng, dia sandiri herang, sebab kalo om Kalo marah Keke batona, dari pertama waktu dia cirita Keke ada depe Romeo, pasti so dari situ om Kalo pi rako pa Keke. Tanta Onya mendadak tahu depe masalah ada di mana.

“ Ngana nyanda suka dia batona deng Tole’ pe anak, kang ? kiapa so Kalo ? “ tanya tanta Onya stengah menuduh. Om Kalo batengo pa depe bini, kong pindah depe mata ka Keke pe pintu kamar. Dia tiba² rasa manyasal so tampeleng pa depe anak sayang-sayang, depe Keke satu-satunya, hanya karna masa lalu, om Kalo mendadak mulai melamun, dapa inga ulang tu dulu-dulu………

Om Kalo sebenarnya bukang asli orang kampung itu, dulu om Kalo deng depe keluarga tinggal di Tataaran, di Tondano sana. Om Kalo masih dapa inga skali, waktu itu om Kalo umur 10 taong. Om Kalo ada sementara bakutulung deng om Kalo pe Papa di kobong pece, user-user burung yang datang coba mo teto tu padi-padi yang so mulai bakuning depe warna. Kage-kage, dari arah kampung, ada 4 tantara datang ka kobong pece, kong nyanda pake tanya-tanya, dorang langsung borgol kong bawa pa om Kalo pe Papa.

Depe cirita nanti om Kalo tau waktu dia pulang di rumah. Ternyata katu’ om Hentje, orang paling kaya di kampung yang lapor pa tantara katanya om Kalo pe Papa ada bapancuri pa dia pe rumah. Cek para cek, tu depe tuduhan nyanda butul, om Kalo pe Papa kaluar dari penjara, mar depê nama so terlanjur jadi rusak. Samua orang di kampung kase sarani ‘keluarga papancuri’, lantaran om Hentje kase sebarkan cirita, bahwa om Kalo pe Papa sebenarnya butul ada pancuri itu depe barang², mar lantaran dia ada sudara tantara, makanya dia orang kase kaluar dari penjara. Di skolah, samua orang basusere turus pa om Kalo, terutama si Tole’, om Hentje pe anak. Nyanda tahang deng samua itu, om Kalo pe Papa bekeng keputusan untuk pindah dari Tataaran, merantau ka kota Manado ( kong jaoh jo tu tampa merantau !! )

Nantinya om Kalo baru dapa tau, kalo om Hentje dari dulu memang so banyak kali coba bekeng busu om Kalo pe Papa pe nama, gara-gara om Kalo pe Mama. Om Hentje itu terkenal sebagai ‘kalapa tua’ di kampung, semakin tua semakin baminya. Maniso sosoro gatal sampe di ujung solop. Suka skali ganti-ganti bini, pokoknya depe semboyan ; ‘’ mati satu tumbuh seribu, so bosan pa maituaku, ganti dengan yang masih fresh dan cantik itu ! ‘’

Waktu dia baru cere deng depe bini yang entah so ka barapa belas, dia dapa lia pa om Kalo pe Mama yang waktu itu masih bulum jadi deng om Kalo pe Papa, biar dia so keriputan, so bobou tanah, om Hentje nekat pi maso minta pa om Kalo pe Mama pe orangtua, yang lantaran silau dengan om Hentje pe gigi palsu mas, langsung trima tu lamaran. Taunya om Kalo pe Mama sementara ada batona deng om Kalo pe Papa, dapa dengar depe orangtua trima tu om Hentje pe lamaran, om Kalo pe Mama langsung pangge bakulari pa om Kalo pe Papa, jadilah dorang dua kaweng koboi. Om Hentje marah skali baru dia dapa tau om Kalo pe Papa deng Mama so kaweng, mar dia nembole bekeng apa-apa. Makanya sepanjang om Kalo pe Papa pe hidop berumah tangga waktu masih tinggal di Tataaran, om Hentje salalu berusaha bekeng susah pa dorang pe keluarga.

‘’ Kalo…… !! ‘’ suara tanta Onya bekeng om Kalo langsung takage dari depe acara melamun.

‘’ Kiapa Onya ? ngana ini bekeng kage pa kita ! ‘’

‘’ Ngana ini rupa ada di bulan, eh ! so dari tadi kita ada pangge², ngana cuma acuh akang, kita riki amper pangge pa oma Wawu, ta tako ngana so kemasukan roh jaha, tadiang² bagitu bekeng kita panik ngana ini ! ‘’

‘’ Kita kwa dapa inga pa Tole’ pe Papa, Onya ‘’

‘’ Hah ?! ngana kanal pa Tole’ pe Papa ? bagimana mungkin sedangkan dorang Tole’ baru 2 taong ada bapindah kamari, deng menurut yang kita dengar Tole’ pe Pa’ so meninggal dari lama ?!! ‘’ tanta Onya herang dapa dengar om Kalo pe ucapan.

Om Kalo lalu bacirita pa tanta Onya tu om Kalo pe Papa deng om Tole’ pe Papa pe kisah. So lama om Kalo abis bacirita depe kisah lalu pa tanta Onya, sang maitua masih tahaga-haga dapa dengar samua itu. Skarang baru dia mangarti kiapa kong om Kalo brubah jadi Terminator tadi.

“ Kalo, itu kan masa lalu. Nyanda ada hubungannya dengan masa skarang. Untuk apa ngana mo banapsu bagitu dapa dengar Keke batona deng Tole’ pe anak, cuma gara-gara perkara dulu-dulu. “ palang² tanta Onya coba kase nasehat pa depe laki itu. Dia tau skali kalu om Kalo sayang pa Keke, seumur-umur Keke mulai dari lahir sampe skarang, baru tadi om Kalo taruh tangan pa dorang pe anak semata wayang itu.

“ Ngana memang butul, Onya. Cuma tu Tole’ deng depe Papa pe bekeng² pa kita pe keluarga dulu susah kita mo lupa. “ ada rasa manyasal dapa dengar dari om Kalo pe suara.

“ Kalo, dorang pe kalakuang itu bukang ngana yang musti hakimi lewat Keke deng Toar, itu Tuhan pe urusan. Noh ngana lia sandiri Tole’ so jaga dapa kredit dari depe perbuatan dulu² itu ! ‘’ tanta Onya bilang bagitu lantaran memang om Tole’ so lumpuh gara² kecelakaan motor taong lalu, kong so nembole karja.

Om Kalo langsung tadiang dapa dengar tanta Onya pe kata-kata.

‘Malam minggu, malam yang panjang, malam yang asyik ‘tuk berpacaran…..’ dapa dengar Keke bersenandung di dalam depe kamar. Keke sanang skali malam ini, soalnya tadi sore om Kalo bilang pa Keke, kalu om Kalo so nyanda marah Keke batona deng Toar, om Tole’ pe anak itu. Om Kalo katu jadi sadar lantaran tanta Onya so kase inga pa dia. Tanta Onya sandiri terangkan pa Keke, kiapa kong depe Papa marah sampe tampeleng pa dia. Pokoknya tanta Onya cirita samua pa Keke. Jadi malam ini Keke sanang biarpun dia nyanda mo bakudapa deng Toar, soalnya Toar bilang dia mo pigi pa depe Oma pe rumah di Tataaran. Keke sandiri bilang pa depe Romeo, dia nyanda mo kaluar rumah. Mar, berhubung tadi Eva, Keke pe tamang bae datang pangge pa Keke mo pigi ka harijadi pa Eva pe tamang, Keke langsung iyo akang, dari pada malam minggu cuma baforo di rumah ?

Baru abis basaleng baju, Keke langsung pamit pa depe Papa deng Mama, kong langsung bajalang mo pigi pa Eva pe rumah. Sebenarnya Keke kurang sanang Toar nyanda ada di kampung, soalnya nentau kiapa, tiap kali nyanda dapa lia Toar pe werge** biar cuma satu hari, Keke pe hati resah skali, makang rasa ada talang durian pe kuli, minum rasa ada minum captikus kadaluarsa ( memangnya captikus jaga kadaluarsa ?!! ), pokoknya nyanda tentram Keke pe jiwa-raga. Apalagi malam minggu bagini, saat Keke pe tamang² berpasang-pasangan, kong Keke merana sendirian, mana tahannnn…untung Eva datang pangge pa Keke batamang pigi pesta harijadi.

Eva pe rumah masih kira² 300 meter lagi, Keke agak tako sadiki. Soalnya kalu mo pigi pa dorang Eva pe rumah, musti lewat pekuburan. Pas Keke sampe di muka kubur, dia baru mo ancang-ancang lari, tiba-tiba dia dapa dengar suara yang dia so kanal skali, suaranya si Toar.

“ Itu cuma gossip, Rin. Sapa yang bilang pa ngana ? kita nyanda batona deng Keke, kita deng dia cuma batamang biasa ! “

Keke pe jantong bajalang dua kali lebe capat, depe rasa tako taganti deng rasa penasaran, palang² Keke bajalang badekat ke arah Toar pe suara. Suara itu datang dari balakang kubur di dekat pintu masuk kompleks pekuburan. Keke pe hati rasa tacucu dapa lia Toar sementara duduk di atas kubur deng Rini, Keke pe tamang satu klas di skolah, pe mesra dorang dua sementara ada bakupegang tangan.

“ Toar !!! ngana memang pangputar bale !!!!! “ nyanda tahang depe saki di hati, Keke langsung bataria bekeng kage pa Toar deng Rini. Nyanda pake tunggu-tunggu, Keke langsung lari pulang pa depe rumah, dengan pipi punung aermata.

“ Onya, Keke so tasono ? “ Tanya om Kalo palang-palang. Dia takage² tadi dapa lia Keke maso ka rumah rupa angin puyuh, langsung banting pintu muka kong maso pa depe kamar. Om Kalo coba tanya, Keke cuma balas deng manangis, terpaksa om Kalo serahkan tu urusan pa depe maitua. Tanta Onya memang jago babuju, nyanda sampe dua menit, Keke pe pintu kamar so tabuka.

“ Sudah, Kalo. “ balas tanta Onya babise

“ Kiapa si Keke ? ‘’ nyanda pake tunggu besok, om Kalo langsung ke pokok persoalan, tanta Onya lalu cirita pa om Kalo samua yang Keke cirita pa dia.

‘’ O…rekey, Onya. Memang rupa si Utu bilang, ‘like grandfather…..like grandson !!’. Opa deng cucu so kurang sama depe maniso, memang kwa’ tu mangga, dia mo pi babuah rambutan ?!! “ om Kalo sapu-sapu dada… rasa sayang pa depe Keke yang baru kanal cinta pe manis, kong langsung rasa tu cinta pe pait.

‘Keke…..Keke….hidop ini kasiang anak, lebe kejam dari putus cinta, mar ngana skarang sementara lewati itu proses natural seorang manusia biasa, akan ada waktu di mana ngana bakal mangarti, kalu itu hidup lebe susah dari yang ngana bayangkan..’ om Kalo berfilosofi di dalam hati……….

Paris, 05 Mars 2002

Miniseri : Kisah keluarga Om Kalo dan Tanta Onya (seri 4-OMA NONA)

Bakudepa ulang biar cuma lewat miniseri. Seri yang satu ini, terinspirasi dari kehidupan sehari-hari pa kita pe tanah kelahiran tercinta, yg punya 1001 macam cirita. Mungkin juga, torang samua pernah ada dalam situasi yg sama deng oma Nona, ato depe kebalikan, berada dalam posisi org2 yg bagosip tentang oma Nona. Whatever, semoga cirita ini menghibur, karna memang so itu tu depe tujuan noh..

OMA NONA

Dalam kehidupan manusia biasa, so lumrah kalo ada yang jatuh cinta, ada yang patah hati, deng di mabuk asmara. Mar hal yang sebenarnya so biasa itu, jadi luar biasa kalo yang sementara da kasmaran itu so oma umur 70 taong. Itulah yang sementara ada jadi pa oma Nona. Noh tau jo bagimana tu model² orang pa dorang om Kalo pe kampung, tu berita-berita model bagitu, capat skali menjalar, memang rupa batata’ pante. Pokoknya baru tu cirita sampe pa tanta Reni ‘ the queen of Karlota ‘, cuma dalam hitungan satu jam, so yakin dan pasti tu kabar samua orang di kampung so tau.

Oma Nona ini so 15 taong jadi janda. Depe paitua mati lantaran dapa kolera, nyanda sempat tertolong. Waktu depe paitua meninggal, oma Nona sempat basumpah nyanda akang pernah dengan laki-laki laeng, mar yah..namanya juga manusia biasa, tambah ley kalu tu yang namanya cinta so datang, rupa orang bilang, biar tai gigi rasa coklat, kwa !! hele sumpah oma Nona cuek. Mar itulah hidop ! torang nyanda akan pernah tau apa yang akan terjadi di masa datang.

Menurut kabar yang beredar, oma Nona pe jantung hati tinggal di kampung sabalah, depe nama opa Oncing. Sama deng oma Nona, opa Oncing so duda.

Pokoknya mulai dari berita itu beredar, setiap gerak-gerik oma Nona, jadi perhatian samua orang di kampung itu, kecuali depe anak-anak muda yang memang nyanda farek deng tu barang-barang bagitu.

Pagi-pagi jam 9 baru oma Nona pe pintu rumah tabuka, samua mata orang-orang yang sementara da ba smokol tinutuan pa tanta Yeni pe warong langsung melotot ka arah oma Nona pe rumah, maklum dia pe rumah kan cuma bakumuka deng tanta Yeni pe warong.

“ Ngana lia Onya oma Nona pe muka pe berseri-seri ! “ tanta Lena babise pa tanta Onya, sementara depe tangan kanan loku tu tahu isi 4 biji.

‘’ Iyo kang, ngana lia Lena, oma Nona so jaga basemengken lagi ! ‘’ tanta Onya balas babise mar depe mata so mulai jaga haga miring pa tanta Lena, soalnya ini hari tanta Onya pe harijadi, kong tanta Lena minta traktir tinutuan. Tanta Onya sih anggap itu biasa, mar dia so mulai bangka dada, lantaran tanta Lena so sampe di porsi ka tiga, kong tu tahu isi so ke 6 biji. Tanta Onya lebe resah lantaran depe utang tinutuan kalamaring pagi dia bulum bayar pa tanta Yeni.

‘’ Pagi samua !!…….. ‘’ oma Nona maso ka dalam warong dengan muka yang bersinar pe ceria rupa matahari pake lampu petromaks ( hehe !! ini cuma kita pe istilah tambahan ..)

‘’ Pagi oma Nona… !! ‘’ biasanya kalo ada orang kase selamat pagi bagitu, cuma satu

dua yang manyao, kong tu laeng angka tangan, ato sekedar kase senyum. Mar kali ini, nentau kiapa stou, samua orang yang ada sementara smokol tinutuan ato mi campur, ataupun yang sementara coba babuju pa tanta Yeni supaya tanta Yeni

kase utang rampa-rampa, koor umum babalas oma Nona pe selamat pagi. Oma Nona riki taherang-herang dapa lia tu orang-orang di dalam warong ada manyao rupa anak-anak skolah minggu ada bajawab pe depe encik deng engku.

Oma Nona langsung duduk di dekat pintu.

“ Yeni, coba ngana kase kamari tinutuan campur, mar nda’ usah pake kuli ba’, neh ?! “ oma Nona bapasang pa tanta Yeni. Tanta Yeni pe biji mata langsung manyala rupa tu burung loyot ilang kacamata dapa dengar oma Nona bilang tak usah taruh itu kuli ba’. Soalnya dia tau skali oma Nona pe selera, tinutuan campur tanpa kuli ba’ for oma Nona, bagaikan siang tanpa matahari. Pernah satu kali tanta Yeni nyanda dapa kuli ba’ di pasar, jadi dia satu hari bajual cuma tinutuan campur sasaja, nyanda pake tu kuli ba’. Karna oma Nona penasaran skali, dia cari dari Manado riki sampe Tondano, dia baru berenti setelah dia so dapa tu kuli ba’ yang dia cari. Pulang ka Manado so mulai sore, tanta Yeni so mulai basiap mo tutup depe warong, lantaran tu jualan banyak yang so laku, deng juga seperti biasa orang-orang makang tinutuan campur cuma pagi-pagi. Oma Nona saking nekatnya dia singgah beli kangkong di pasar sore, kong dia paksa pa tanta Yeni bekeng depe tinutuan campur. Makanya skarang dia bilang tak usah taruh tu kuli ba’, tanta Yeni amper dapa serangan jantung.

‘’ Apa oma Nona bilang baru-baru ? ‘’ tanta Yeni masih bulum parcaya deng depe talinga.

‘’ Kita bilang Yeni,…bekeng akang tinutuan campur, mar nyanda usah taruh kuli ba !! ‘’ oma Nona jawab dengan suara lebe karas dari yang tadi.

‘’ Tumben oma Nona nemau pake kuli ba’ ? dokter larang, oma ? “ tanta Onya basuara bapancing

“ Nyanda Onya, cuma kita kwa’ lagi badiet, tau jo tu kuli ba’ depe kalori banyak skali, bekeng lebe bangka tu badang ! “ oma Nona manyao rupa tu ahli-ahli diet. Di sablah pa tanta Onya, tanta Lena langsung tatigo dapa dengar oma Nona da bilang.

‘’ Adoh Lena, bae-bae sadiki kalo mo batalang makanang. So kabarapa porsi komaling ngana ini ? so boleh badiet akang sadiki eh, Lena. Lia kasana ngana pe badang itu so rupa tu gajah. Cuma tako kong Utu pi balaeng baru ngana tahaga-haga !! ‘’ oma Nona kase nasehat pa tanta Lena. Tanta Lena yang bulum pulih dari depe tatigo, langsung takage deng oma Nona pe bicara, nyanda rekeng tiga tanta Lena langsung ba nae darah.

‘’ He oma Nona, urus jo oma pe diri sandiri, tak usah mo urus orang pe hidop. Kita

mo gode, ka mo gendut, itu kita pe urusan !! ‘’

‘’ Kita bukang mo urus orang pe hidop, cuma sayang pa ngana, tiap bulan musti bili baju baru, lantaran tu baju lama so nyanda muat di badang. Deng nyanda bagus dapa lia ngana pe bodi so model oto trek bagitu, so nyanda sexy, Lena. ‘’ kali ini

tanta Onya yang tatigo dapa dengar oma Nona bilang tu kata ‘sexy’

‘’ Betul itu apa oma Nona punya kata, perlempuan musti tampil sexy, biarl paitua nyanda bosan liat ! ‘’ mister Opo yang daritadi cuma badiang iko nimbrung di percakapannya dorang, dengan depe logat khas suka kase baku campur tu huruf ‘L’ deng huruf ‘R’.

Biar somo amper 25 taong tinggal di Manado, si Mister Opo tetap malintuang turus tiap kali dia coba bacirita pake bahasa Manado. Mister Opo ini tanta Kalista pe paitua. Dia orang Belanda, sebenarnya depe nama butul Haarlock, mar lantaran orang-orang di kampung bilang depe nama susah mo cumu, tu anak-anak muda langsung sarani pa dia deng nama itu, yang dia pake sampe dunia skarang.

‘’ Ngana so dengar pa mister Opo, Lena ? itu laki-laki pe bicara, butul tokh tu yang kita bilang pa ngana ? ‘’ oma Nona serang pa tanta Lena, yang akhirnya tabadiang so nentau mo manyao apa. Tanta Lena so rasa kerene, dia langsung baangka dari tampa dudu.

‘’ Onya, kita somo kamuka, neh ?! ‘’ ternyata tanta Lena mo pulang.

‘’ Nyanda kase abis tu di piring, Len ? ‘’ tanya tanta Onya berbasa-basi, sebenarnya di dalang hati dia so berharap, minta doa tanta Lena capat kanyang.

‘’ Sudah jo, Onya, oma Nona so bekeng ilang kita pe selera makang, eh makase jo, neh ?! ‘’ tanta Lena langsung kaluar dari warong. Tanta Onya pe bersyukur dalam hati nyanda dua, memang. Untung ley kasiang oma Nona datang kong bekeng tanta Lena pe selera makang ilang, bagini abis kwa’ tanta Onya pe doi simpanan di celengan for bayar utang pa tanta Yeni. Menurut depe selera makang so ilang, tanta Lena sampe di porsi katiga, noh bagimana dang kalo dia masih ’berselera’ ? tasalah hele tanta Yeni pe sondo dia reno-reno kong talang, kwa’ !

Hari minggu pagi, orang-orang yang mo smokol so takumpul pa tanta Yeni pe warong. Biasanya kalo hari minggu bagitu, tanta Yeni buka hanya dari jam 7 sampe jam 8:30, kong langsung tutup lantaran jam 9 musti pigi ke gereja.

Di warong ada om Abe, om Emil, tanta Ola, tanta Onya, tanta Lena, tanta Mien, deng om Endi sementara ba smokol, waktu oma Nona maso di warong, kelihatan elegan skali. Oma Nona lalu kase selamat pagi, kong langsung duduk di sei pa om Endi.

“ Bagimana ngana pe kabar, Endi ? ada tabangun di got mana pagi ini ?! “ oma Nona basindir pidis. Om Endi kan “The king of the drunken master“ di kampung. Depe motto, tiada hari tanpa botol captusa...eh captikus, sekali di got, tetap di got !! pokoknya luar biasa om Endi ini. Satu kali, saking semangatnya, hele spritus om

Endi talang, depe laste dia kurang kase nae di bendi kong bawa lari ka rumah sakit ( catatan : ini bukan lantaran lagu om Endi, nae di bendi, bola taputar om Endi talempar...mar memang dorang kurang muat pa om Endi di bendi lantaran nyanda ada oto mikro yang mo suka muat pa dia, gara-gara om Endi so mabo karas, tamuntah-muntah, kong so buang aer basar di calana !! )

“ Biasa...pinjam om Kale pe got...“ om Endi manyao asal-asal.

“ Tumben nyanda pinjam kita pe got, Endi ?! “ oma Nona tambah batanya stengah sinis.

“ Oma Nona pe got so ilang depe kualitas, makanya so jadi malas mo pinjam. Tambah lagi oma so mumaras tu rumpu japang yang ada bartumbuh di got, so nyanda empuuukk !! “ om Endi manyao lebe asal-asal. Dia kwa agak-agak sentimen pa oma Nona, soalnya bulan lalu, pas sementara asik-asik tidor di pa oma Nona pe got kong mimpi batifar saguer , kage-kage om Endi so basah kuyup. Ternyata oma Nona yang berbaik hati kase bangong pa om Endi deng aer bakas cuci piring. Om Endi bataria nyanda dua lantaran depe mata pidis skali kanal tu aer. Mulai hari itu, om Endi langsung tobat pinjam oma Nona pe got.

Oma Nona cuma haga miring dengar om Endi pe jawaban, dia langsung pi badekat pa tanta Yeni, kong pasang depe tinutuan campur, lagi-lagi…, nyanda pake kuli ba’ .

Jam 9, di kampung so sunyi, karna amper samua orang so digereja, kecuali ada sadiki yang pigi ka ‘gereja padang’, bawa dorang pe ayam manyabung, termasuk om Endi. Dia kwa memang maso dalam kategori ‘bad boy’ pa dorang om Kalo pe kampung.

Kali ini, dorang om Endi deng kawang-kawang nyanda pigi ka utang rupa biasanya. Berhubung ada acara peringatan ulang tahun ke 40 gereja-nya dorang om Kalo, dorang bekeng ibadah mingguan rupa biasa, mar abis itu ada acara makang-makang, yang di bawa dari rumah masing-masing, jadi om Endi dkk cuma pigi pa om Ungke pe tanah kosong di dekat kantor Kuntua, kong mulai ator dorang pe acara manyabung di situ. Om Kalo sandiri berela-rela dengar om Arnol pe kata-kata sambutan yang depe panjang kali ini so bukang rupa Suharto pe pidato 17 Agustus, mar rupa tu Suharto pe pidato pertanggung jawaban pa MPR ( memang kalu tanta Lena nyanda bakode deng depe kukehe bekeng-bekeng, om Arnol lupa berenti, kwa !! ), lantaran dia dapa dengar kabar burung, kalu tanta Els mo bawa depe kukis lalampa kebangsaan, kesukaan om Kalo.

Ibadah baru saja klaar, tu tanta-tanta deng dorang pe anak nona-nona sementara sibuk ba ator meja, tanta Onya baru mulai bakase kaluar tu depe piring-piring porselen cantik, tiba-tiba dari arah kampung ( soalnya tu dorang pe gereja terletak di ujung kampung ) muncul opa Oncing, yang di gosipkan sebagai oma Nona pe sayang-sayang. Opa Oncing langsung nae di tangga gereja, kong barapat pa oma Nona yang ada sementara babaator piring, lalu babise di talinga. Dapa lia

adegan itu, tanta Lena langsung buka suara basinggung,

“ E..dodo’…tunggu sampe di rumah do’en…so nyanda sabar bagitu !! “

Oma Nona pe mata langsung bahaga nafsu pa tanta Lena, memang sejak oma Nona kase saran supaya tanta Lena bakurus sadiki, dorang dua pe hubungan antar birman yang dulu pe manis-skali ada terjalin, langsung rusak. Mulai dari itu tanta Lena jaga basentimen pa oma Nona.

‘’ Ngana ganu’ so Lena ? bekeng kalo suka… !! ’’ oma Nona balas baterek. Mar dia langsung bajalang maso ka dalam gereja, sementara opa Oncing ba ekor di balakang. Nyanda lama abis itu dapa lia om Ungke kaluar laju-laju dari dalam gereja, kong langsung bajalang pulang.

“ Kiapa Ungke ? “ om Kalo bataria batanya, herang dapa lia om Ungke somo pulang, padahal hehe makang mar bulum.

“ Mo bale ulang kita, Lo ! cuma rabu-rabu mo ka rumah ! “ balas om Ungke kong langsung stengah lari.

Sementara itu, tanta Lena nyanda abis-abis depe rasa penasaran gara-gara oma Nona pe baterek tadi. Apalagi tatambah deng opa Oncing yang oma Nona tahang for mo makang sama-sama deng dorang. Pas tanta Lena pe dapa lia oma Nona maso ka dalang gereja, dia laju-laju badekat pa opa Oncing, pura-pura batanya,

“ Kiapa Ungke laju-laju pulang opa ? “ tanya tanta Lena

“ Kita kwa’ tadi lewat pa dorang om Ungke pe rumah, di tanah kosong pa dorang pe sablah rumah, kita dapa dengar ribut-ribut, kong kita pi lia, ternyata si Endi sementara mamanangis, depe kaki tagate pa om Ungke pe perangkap babi utang tua, kong so takunci mati, so nembole takaluar ! “ opa Oncing manyao.

“ So dari kiapa kong tu Endi ada di dalang pa Ungke pe tanah kosong itu, kita pe tau tu kintal dorang Ungke ada pagar ?! “

“ Yah, biasa… Endi deng depe kawang-kawang so pastiu pi manyabung di utang, kong dorang cuma cari gampang pi manyabung di pa Ungke pe kintal kosong. “

“ O..oooo…..” tanta Lena goyang² depe kapala tanda mangarti.

‘’ Eh, opa…kita lia-lia opa akhir-akhir ini semakin akrab deng oma Nona, nyanda biasa kita dapa lia opa pasiar-pasiar pa torang pe kampung ! ‘’ tanta Lena bapancing ( memangnya ikan ?!! )

“ Iyo Lena, soalnya kita kwa da urusan deng Nona ! “

“ Urusan apa do’en ? dapa lia pe kancang skali..’’ tanta Lena lebe ba ober mo cari tau tu cirita.

‘’ Torang kwa ada mo barbage budel, Nona itu kan kita pe anak basudara yang paling tua, jadi dia yang ator tu urusan paling banyak ! ‘’ opa Oncing manyao kalem, mar depe manyao bekeng tu muka-muka yang ada di dalam sabua tahaga-haga, mulai dari tanta Onya, tanta Reni, tanta Ola, bahkan yang paling tahaga adalah tanta Lena. Ternyata dang opa Oncing itu katu’ oma Nona pe anak basudara, kong

Dorang so sangka-sangka laeng. Dorang so bekeng felem sandiri tentang oma Nona pe jalan hidop. Tanta Onya haga kong bacubi mata pa tanta Lena, tanta Lena sandiri iko maruku, kong pura-pura lipa-lipa itu serbet tangan.

‘’ Itu tu ngoni pe batata’ nyanda abis-abis, Lena ! bukang dapa depe batu ?!! ‘’ tenyata katu oma Nona dari tadi ada nguping tu tanta Lena pê percakapan dengan opa Oncing.

Tu tanta-tanta samua yang ada di situ cuma maruku dapa dengar oma Nona pe kata-kata.

‘’ Jadi katu’ oma nyanda sementara kasmaran rupa dorang bilang ?! ‘’ tanta Ola tekeng barani batanya.

‘’ Memang kita da sementara kasmaran anak-anak, mar itu bukang ngoni pe urusan, tau !! ‘’ oma Nona manyao dengan mata ba cubi-cubi genit.

Samua yang ada di situ cuma tahaga-haga penasaran, nyanda pake rekeng satu-dua-tiga, samua langsung bakumpul rupa tu pemain bolakaki sementara ator taktik, kong mulai angka cirita, kali ini, tanta Reni yang lebe dulu buka suara,

‘’ Eh, menurut ngoni, sapa yang patut di curigai sebagai oma Nona pe jantong hati, skarang ? menurut kita, mungkin opa Sakole, memang butul dia masih ada maitua, mar coba ngoni perhatikan dia di ibadah jaga tengo² pa oma Nona……bla-bla-bla-bla-bla-bla…….’’

Dasar memang parampuang !!!!!…………………………………………………..

Paris, 18 Mars 2002

Miniseri : Kisah keluarga Om Kalo dan Tanta Onya (seri 3-PILKAKA)

Buat ngoni-ngoni yg suka deng ini miniseri tentang keluarga Om Kalo & Tanta Onya, ini kita posting depe seri ka-3, tentang proses pemilihan kuntua pa dorang pe kampung. Cirita ini terinspirasi dari kehidupan pa kita pe kampung sandiri di Manado, dimana depe penduduk yg skarang so lumayan banya (+5000-an orang), dengan depe permasalahan masing-masing yg kadang garap, kadang beking nafsu, kadang beking nae darah, mar tetap kita cinta..lantaran disitu kita basar, disitu kita balajar tentang kehidupan..Sumompo.

PILKAKA

(PEMILIHAN KAPALA KAMPUNG)

By:N.Sikome

Di kampung pa dorang om Kalo & tanta Onya, lagi beredar gosip terbaru ; om Utu mencalonkan diri untuk jadi kuntua !!

Pertama waktu dengar berita itu, om Kalo nyanda percaya. Dari biar kasiang om Utu jago bicara inggris, dia itu buta-buta ayang kalo bicara soal politik. Kalo mo bicara bolakaki, hele Lionel Messi pe merek calana dalam mar dia tau, mar jangang kasiang mo pangge badiskusi pa om utu tentang politik. So dia itu tu paling buta di kampung. Dulu om Kalo pernah bacirita tentang Ronald Reagan, om Utu pe kira itu tanta Kalista pe laki pe nama. Soalnya tanta Kalista kan kaweng deng bule’ orang Balanda. Om Kalo herang skali, soalnya si om Utu itu jago skali bicara tu Ronald Reagan pe bahasa. Bahkan, konon om Utu jago bicara inggris pake aksen Amerika, Inggris, deng aksen Australia sekaligus, ca’ gampang memang ! mar itulah om Utu. Makanya skarang dapa dengar om utu mo menerjunkan diri ke kancah politik, om Kalo nyanda percaya stengah mo mati, nanti dia so lia tu daftar calon-calon pa tanta Yulin ( tanta Yulin ini administrasi di kampung ), baru om Kalo percaya. Pokoknya amper samua orang di kampung cuma bicara tentang pencalonan om Utu ini skarang ini. Di pa tanta Yeni pe warong saja, tadi pagi waktu om Kalo deng tanta Onya ada pigi smokol tinutuan, samua sibuk bakarlota tentang om Utu, ada yang kontra, rupa si om Abe.

‘’ Utu itu ada salah talang obat apa kong dia pi mencalonkan diri, kang ? ‘’ om Abe buka pa suara pa om Kalo yang kebetulan duduk di muka pa dia. Om Kalo amper tatigo dapa dengar om Abe pe kata-kata.

‘’ Kiapa so Abe ? memangnya nembole Utu mencalonkan diri ? ini kan negara demokrasi, setiap orang berhak untuk menjadi kuntua selama dia memenuhi syarat untuk itu, sesuai dengan undang-undang yang berlaku di negeri ini ! ’’ khotbah om Kalo panjang lebar. Biarpun dia sandiri herang dengan samua fenomena yang terjadi pa om Utu pe diri, dia nyanda suka om Abe bicara bagitu tentang om Utu, sebab bagimanapun om Utu itu depe tamang bae.

“ Memang ngana butul, mar ngana sandiri tau Utu itu depe model bagimana. Ngana inga waktu torang ada berdebat tentang Ariel Sharon waktu dia baru jadi perdana menteri Israel ? dia pe kira Ariel Sharon itu merek kaeng sarong !! noh tu orang model bagitu mo jadi kuntua pa torang pe kampung ? “ nemau kalah om Abe balas so stengah nae darah.

“ He dodo’ ngoni dua ini mo bakupusing deng orang laeng pe urusan, biar jo kasana Utu mo bacalon jadi kuntua kek, ato jadi presiden, itu dia pe urusan bukang ngoni dua pe urusan !! “ kali ini tanta Onya yang manyao lantaran so dapa lia tu suasana yang so mulai menghangat. Om Kalo baru mo babuka mulu, dia langsung tutup laju-laju lantaran dapa lia tanta Onya so kase mata manyala dari sabalah.

Biarpun ada yang kontra, ada juga yang pro om Utu pe pencalonan macam tanta Ola. Tanta Ola ini dia termasuk satu dari sedikit wanita karir yang ada di kampung. Deng tanta Ola juga aktivitis di salah satu organisasi perempuan di pa dorang pe kota. Waktu tanta Onya tanya apa depe alasan pro pa om Utu, dia cuma manyao gaya diplomat ulung,

“ Ngana tau Onya, si Utu itu dia nentau apa-apa tentang politik, itu lebe bagus. Lantaran coba ngana lia tu politikus² ulung di negeri pe model. Lantaran dorang so talalu jago bapolitik, sampe tu rakyat dorang cuma jaga bekeng bodok akang. Lebe bae Utu yang nentau bapolitik, mar nanti nyanda akang mo bekeng bodok tu rakyat, daripada cari tu jago-jago kong cuma jago bekeng bodok orang, io tokh Onya ? ‘’

Tanta Onya cuma goyang-goyang depe stengah kapala ( kira² bagimana itu model goyang² stengah kapala, kang ? ) lantaran dia cuma stengah mangarti deng tu tanta Ola ada bilang. Mar, dia ikut mendukung tanta Ola pe pendapat sebab dia biar cuma jaga tengo deng stengah mata tu berita² di televisi, tanta Onya tau kalo tu politikus² di negara ini memang so talalu dorang pe kalakuang tinggal ada bekeng bodok rakyat. Jadi menurut tanta Onya, so butul tu tanta Ola ada bilang. Makanya tanta Onya ambe keputusan, di pemilihan kuntua nanti, dia mo pilih pa om Utu !!

Pemilihan kuntua tinggal 3 minggu lagi mo di laksanakan. Amper samua calon so dari jao-jao hari basiap deng dorang pe taktik, kecuali om Utu. Kali ini yang jadi calon ada 6 orang ; om Ody, om Emil, om Ungke, om Odo, om Hans deng om Utu sandiri. Om Ody mulai dari jao-jao hari, biar tu waktu untuk kampanye sebenarnya masih musti tunggu 2 minggu, mar dia so mulai jaga bakampanye sandiri. Depe taktik sederhana mar kelihatannya jitu. Tiap malam, om Ody mulai jaga ronda malam di warong-warong, di mana tu ‘drunken-drunken master’ pe tampa badudu. Kong tiap kali dia dapa lia ada banyak ’drunken² master’, dia mulai pura² badudu deng dorang, kong om Ody perentah pa tuang warong for kase kaluar 4 botol capkawok, nanti dia yang bayar. Taktik om Ody ini memang kelihatan jitu, soalnya waktu dorang ada sementara bagate, tu jago² minum samua bilang pa om Ody, dorang satu keluarga yang so wajib pilih pasti akang cucu om Ody pe gambar ( om Ody pake gambar padi ), mar lantaran so minum talalu banyak tu capkawok, depe besok dorang so lupa kalo om Ody ada bayar akang captikus pa dorang tadi malam, sekalian so lupa tu dorang pe janji pa om Ody.

Laeng lagi deng om Emil pe taktik. Waktu masa kampanye so tiba, om Emil mulai pasang muka manis a la Bruce Willis, kong mulai dia baober kasana kamari rupa tu tanta² abis hambak, mar bukang cuma sambarang baober. Om Emil pe tujuan tu tanta-tanta deng nona-nona. Berhubung om Emil karja di perusahaan ‘Mustika-Nyaku’, yang bekeng produk kosmetik nomor satu dalam negeri, dia mulai jaga barbage semengken gratis, itu kueku for tampal² di pongo-pongo gratis, eye shadow gratis, eye-liner gratis, deng produk² kosmetik laeng, nyanda lupa om Emil ‘kase’ janji, kalo dorang pilih pa dia, nanti om Emil akang kase kartu anggota for dapa diskon 70 persen kalo mo babili kosmetik merek ‘Mustika-Nyaku’.

Cuma, ada satu yang om Emil lupa, kalo torang pe masyarakat banyak yang masih pake sistem patriarchi, di mana banyak dalam satu keluarga, apa yang kepala keluarga pilih ( suami, ayah ), itu otomatis akan jadi pilihan yang sama bagi samua isi keluarga. Tanta Onya sih iyo² akang pa om Emil, sapa sih yang nemau dapa semengken gratis , merek terkenal lagi biar cuma di dalam negeri !! memangnya om Emil mo pi tau apa tanta Onya mo cucu nanti ?! cuma tanta Onya sandiri yang tau depe pilihan. Kan pemilihan nantinya akan di langsung-kan secara LUBER ( langsung-umum-bebas-rahasia ), kecuali kalo om Emil bayar pa team pengawas for cari tau sapa-sapa yang pilih padia, sama deng yang terjadi pada Pemilu waktu lalu, dan jadi skandal paling basar dalam sejarah pa dorang pe kampung. Waktu itu yang da jadi, partai ‘BPP’ alias Bulan Pake Payung kedapatan ba sogok pa team pengawas for cari tau sapa-sapa ada pilih pa apa. Pemilihan terpaksa di batalkan, kong dorang bekeng ulang pemilihan nanti satu bulan abis kasus itu.

Bukannya tanta Onya pe keluarga pake sistem ‘patriarchi’ ( pe susah skali mo eja ini kata satu ini, eh !! kita riki dua kali salah ketik…. ), mar om Kalo deng tanta Onya sama² memang mo pilih pa om Utu, berdasarkan dengan pertimbangan² hal-hal semacam yang tanta Ola ada bilang.

Dari samua calon, hanya om Emil deng om Ody yang pake teknik agak-agak ekstrem. Laeng dari itu, tu calon-calon laeng cuma pake teknik biasa.

Rupa om Ungke, dia cuma kase barbage Ubi deng kalapa sayor, mar memang om Ungke dari dulu pe bae-bae skali, kalo ada orang di kampung mo suka makang Ubi, tinggal pi minta pa om Ungke, dia langsung kase. Nyanda perlu mo pake bayar lagi ! jadi bukang cuma lantaran kampanye kong dia kase burbage ubi cuma-cuma, dia memang so bagitu dari dulu.

Cuma jangang kira om Ungke cuma tau bapacol, dia itu SH kasiang, lulusan university of California. Pengacara paling top di kota, mar tetap low profile. Sama deng waktu sebelum sukses, om Ungke tetap masih suka bapacol, batanang ubi deng batata di pa dia pe kobong. Sebenarnya om Ungke nemau mo jadi kuntua, depe pencalonan sandiri gara-gara tanta Mien depe maitua pe karja. Soalnya tanta Mien lagi bakustrekel deng tanta Oda, om Odo yang so dua periode jadi kuntua pe, maitua. Bagitu tanta Mien dapa tau om Odo bacalon ulang, nyanda pake tanya² pa om Ungke, tanta Mien langsung pigi badaftar pa tanta Yulin, om Ungke pe nama.

Om Odo pe model kampanye rupa taong-taong lalu masih sama. Dia kan orang paling kaya di kampung, so dua periode dia jadi kuntua. Jadi, dia so tau skali bagimana depe cara mo tarek para simpatisan. Periode² yang lalu, saat bakampanye, om Odo salalu pake cara yang paling jitu, mar nyanda samua orang boleh mo pake. Dia kase barbage cuma-cuma depe doi pa orang-orang di kampung. Bayangkan jo waktu kampanye lalu, ada 1 kilometer orang yang baantri mulai dari muka pa dorang om Odo pe rumah, sampe di muka kantor kuntua, lantaran mo ambe dorang pe ‘gaji tanpa suar lalah’ yang om Odo ada distribusi.

Om Hans sandiri pe cara bakampanye, pake tanta Els pe keahlian. Dia suruh pa tanta Els bekeng kukis lalampa banya-banya, kong dia kase burbage pa orang² di kampung. Gara² om Hans pe cara bakampanye pake lalampa itu, om Kalo sampe jadi bingo mo pilih pa om Utu ato pa om Hans. Soalnya om Hans pe kurangajar skali bilang pa om Kalo, kalu om Kalo pilih pa dia, tiap hari minggu om Kalo bakal dapa 10 lalampa gratis, lantaran om Hans tau skali, kalu di hadapan lalampa-nya tanta Els, om Kalo nyanda berdaya, om Kalo kan penggemar berat lalampa-nya tanta Els.

Yang paling mengherankan, sampe masa kampanye somo abis, om Utu kelihatan tenang-tenang saja, nyanda ada sedikitpun aksi dari dia untuk menarik depe simpatisan. Om Kalo nyanda tahang, dia langsung tanya pa om Utu.

“ Utu, lusa tu masa kampanye somo abis, kang ?! “ om Kalo pura-pura ator cirita pa om Utu yang sementara ada basirang tanta Lena pe bunga.

“ Iyo, Lo ! “ om Utu cuma babalas pende-pende.

“ Kong ngana dang, Tu ? “ tanya om Kalo

“ Kiapa deng kita ? “ om Utu balas batanya, bekeng om Kalo salah tingkah. Sebenarnya om Kalo tau itu bukang depe urusan, mar dia nyanda tega kalu nantinya dia mo dapa lia depe tamang bae kalah telak di pemilihan kuntua.

“ Kapan ngana mo bekeng ngana pe kampanye ? “

Om Utu berenti dari depe aktivitas basirang bunga, dia lalu tengo herang pa om Kalo,

“ Kampanye apa, Lo ?! “

Ya ampun !!! om Kalo baru sadar, kalo ternyata selama ini om Utu cuma ada babadiang bukang lantaran sedang menyusun taktik rupa tanta Onya bilang, mar lantaran dia nentau stengah mo mati tu prosedur pemilihan kuntua !!

Prolog : Pemilihan kuntua di kampung pa dorang om Kalo pe hasil akhir adalah om Ungke yang dapa suara terbanyak. Sedangkan om Utu, hanya ada 3 suara yang pilih pa dia ; suara tanta onya, om Kalo, deng tanta Lena, om Utu pe maitua. Banyak orang² kampung laeng yang bapikir kalo om Utu so mengundurkan diri dari pencalonan, nentau ternyata kote’ lantaran om Utu nintau bagimana cara mo bakampanye !!

Miniseri : Kisah keluarga Om Kalo dan Tanta Onya (seri 2-Untung Manyabung Ayang)

Napa dang, depe seri ka-2...kali ini, kita dedikasikan untuk samua pang manyabung ayang yang ada di Sumompo dan sekitarnya, jang sampe mimpi jaha neh, mimpi ayang yang kase manyabung pa ngoni, hehehehehehe....

UNTUNG MANYABUNG AYANG

Oleh: Novita Sikome

Pagi-pagi di hari minggu, tanta Onya pe muka kelihatan kusut rupa tu banang manjae ada talingkar-lingkar di kusu-kusu, kong om Ome pe sapi tambah injang-injang ( rasa jo !! ). Tanta Onya pe hati memang lagi resah dan gelisah ( rupa Obbie Messakh pe lagu ), tadi pagi-pagi skali, bahkan sebelum om Kalo pe ayang manyabung bakuku, tanta Onya so buka depe celengan. Dia cuma dapa 5000 perak di situ. Nyanda cukup deng tu 15000 yang om Kalo ada kase tadi malam. Tanta Onya memang lagi melarat, soalnya so amper satu bulan om Kalo nyanda karja abis dapa berenti dari dia pe tampa kerja dulu. Om kalo bukang dapa berenti lantaran korupsi ato apa, samua karyawan dapa berenti gara-gara depe perusahaan itu jadi bangkrut mendadak. Hari ini hari minggu, so jadi kebiasaan pa dorang pe keluarga, tiap hari minggu tanta Onya sasalu mumasa agak spesial, kalo hari-hari biasa ikang Tandipang ato ikang Deho deng Tude, hari minggu tanta Onya salalu cari ayang biar cuma 1 ekor kacili, kong bekeng ayam rica-rica kesukaannya om Kalo, deng salalu dia goreng tu ayang pe pala-pala for Keke. Soalnya Keke kwa’ suka skali pala-pala ayam goreng.

Mar hari ini, pesangon yang om Kalo pe perusahaan kase cuma tasisa 15000 perak, tambah deng tanta Onya pe celengan jadi 20 ribu perak. Dunia skarang tu barang² pe mahal rupa harga kintal, deng doi 15 ribu perak itu tanta Onya yakin pulang kamari dari pasar cuma mo dapa bawa rica 10 biji deng daong bawang pe akar. Tanta Onya pe kapala jadi lebe pusing, nyanda sadar dia mulai toki² sandiri depe testa di pintu dapur.

‘’ Eh Onya, ngana ini so meng-meng kong so jaga batoki sandiri tu kapala di pintu ? ‘’ ternyata om Kalo so bangun.

“ Pagi Kalo....asal-asal jo ngana ini, kita kwa’ lagi saki kapala. “ tanta Onya langsung berenti dari depe kesibukan batoki kapala.

“ Kalo saki kapala maitua sayang, pigi cari obat sana kong minum, supaya ilang tu saki ! “ balas om Kalo mesra.

“ Yah kasiang Kalo, sedangkan mo bili ikang deng rampah-rampah ini doi so nyanda cukup, ngana mo suruh pa kita bili obat saki kapala lagi ?! “ tanta Onya mengeluh.

Om Kale langsung tabadiang, dia mendadak sadar kalo dorang pe keluarga sedang dalam kesulitan. So amper satu bulan ini om Kalo kirim² turus surat lamaran ke perusahan-perusahan, mar paling banyak di tolak, ada beberapa memang yang bulum balas pa om Kalo. Cuma om Kalo memang so nemau berharap banyak, jaman krisis bagini, perusahan² malah lebe sibuk kase kaluar karyawan dari cari karyawan.

“ Onya, tak usah jo ngana mo mumasa lebe, bili ikang garang jo for hari ini. “ om

Kalo berusaha untuk bekeng nae sadiki depe maitua pe semangat yang mulai jatung. Tanta Onya amper tatawa dapa dengar depe paitua pe kata-kata, mar sebenarnya dia terharu sadiki. Om Kalo memang nentau stengah mati, kalo tu ikang garang deng ikang roa kiring skarang so lebe mahal dari ikang mantah. Soalnya pe banyak tu orang-orang Manado di perantuan yang borong banyak-banyak tiap kali pulang kampung for bawa pulang pa dorang pe tampa tinggal, kong lantaran itu tu harga jadi nae, tambah lagi ikang roa pe pasaran so mulai kaluar daerah, noh pi tafel jo depe harga skarang, tu 15000 perak cuma boleh mo dapa ikang roa for bekeng tai gigi lantaran cuma sadiki, noh kalo mo rekeng deng rampah² ?! dapa kamari cuma ikang roa anak ( prematur lagi !! ), kacili rupa lobang idong pe basar. Mar tanta Onya cuma senyum-senyum, dia nemau mengeluh pa depe laki, itulah memang tanta Onya pe kelebihan. Dia tahu kalo om Kalo pe pikiran ley lagi ’ruwet’ rupa Mbah Lele’ si orang jawa yang so jago bahasa Tombatu, bilang. Dia tau juga om Kalo skarang lagi pusing-pusing lantaran bulum dapa karja. Tanta Onya cuma goyang depe kapala seakan-akan mo iyo akang itu om Kalo pe saran.

Aha !! kage-kage tanta Onya dapa akal, dia pikir daripada susah-susah mo pi pasar kong pulang kamari cuma mo dapa ikang teri satu loku, lebe bae dia bekeng tinutuan jo. Kangkong dia mo minta pa tanta Vonny biar cuma sadiki, tanta Vonny kan ada talaga kangkong pe basar, bayam nanti ambe di blakang rumah. Sedangkan tu rampah-rampah laeng, nanti dia mo bili deng tu doi 15000 perak. Depe dabu-dabu dia mo campur biar cuma sadiki dengan ikang roa, yang penting so dapa rasa biar cuma di bobou. Tanta Onya tersenyum² sanang, dia langsung bekeng om Kalo pe kopi, deng Keke pe teh, kong dia langsung basadia mo pigi ka pasar.

Sementara tanta Onya ada basaleng baju di kamar, dapa dengar ada orang batoki di pintu. Ternyata katu si Keke.

‘’ Itu ngana karu’ Ke. Kiapa kong tu muka pe asang bagitu, re’en ? ‘’ tanta Onya langsung barasa ada yang nyanda beres pa Keke.

‘’ Ma’, Keke pe doi skolah bulan ini bulum bayar, napa tu Encik so jaga tanya-tanya pa Keke. ‘’ ternyata itu katu’ depe persoalan. Tanta Onya baru dapa inga, dia bulum kase Keke pe doi SPP for bulan ini, begitulah nasib kalu kase skolah anak di skolah swasta yang bagus, musti bayar depe biaya pendidikan, mar demi anak pe masa depan, tanta Onya kase skolah jo noh pa Keke disitu. Mendadak tanta Onya pe kapala mulai saki ulang.

‘’ Ke, bilang pa Encik, basabar dulu sadiki. Terangkan pa Keke pe Encik kalo Papa bulum dapa karja, makanya Keke pe doi skolah bulum boleh mo dapa bayar ! ’’

Keke cuma maruku, itu anak sebenarnya tau depe orangtua pe kesulitan, cuma peraturannya so bagitu di skolah.

’ Iyo dang, Ma. Keke mo berusaha jelaskan pa Encik. “

Waktu Keke kaluar dari kamar, tanta Onya pe aermata langsung maleleh. Baru skarang dorang dapa rasa itu susah. Dulu waktu om Kalo masih karja di

perusahaan, itu doi amper boleh mo bilang tabuang-buang. Tanta Onya hidup sanang, mar lantaran so talalu kesenangan, tanta Onya sampe lupa batabung. Padahal so brapa kali om Kalo kase inga pa dia for simpang² akang biar cuma sadiki, tu doi-doi talebe. Mar tanta Onya cuma acuh, skarang sarta dia rasa tu susah nyanda ada doi, tanta Onya baru mangarti tu pentingnya batabung biar cuma sadiki-sadiki. Tanta Onya pe hati lebe tatambah sedih.

“ Onyaaaaaa !! “ om Kalo pe suara bekeng tanta Onya langsung takage jaha-jaha. Dia langsung lari kaluar dari kamar. Di luar, om Kalo sementara ada manari-manari rupa tu orang kesurupan.

‘’ Kalo, so kiapa ngana ini ? om Endi so pangge bagate komaling para pagi-pagi buta ?! nanti tu liver kambuh ulang, baru ngana tobat !! ‘’ tanta Onya memang binci skali kalo om Endi so mulai jaga bakutempel deng depe laki, soalnya om Endi itu ‘Drunken Master’-nya dorang pe kampung, lihai skali dia itu kalo mo babuju orang minum tu bensin pesawat cap kawok. Minggu lalu tanta Onya sampe panik berat gara-gara om Kalo bagate deng om Endi, kong pulang kamari langsung muntah-muntah rupa tu orang hamil muda.

‘’ Onya sayang !! kita untung Onya, untung banya kita Onya !! 4 juta.......!!! ’’ om Kalo bataria riang gembira. Tanta Onya takage-kage dapa dengar tu berita yang om Kalo sampaikan.

“Untung apa le kasiang dang Kalo ehhhh...”

“Kalamaring kita ada bataruh pe Endi pe ayang manyabung, Pato kwa yg ada buju-buju pa kita, napa dia baru sms datang ambe jo kata tu doi, deri kita yg untung samua, soalnya nda ada orang ba taruh pa Endi pe ayang, Cuma kita. Odoh Onya...dorang tako mo bataruh pa Endi pa ayang der so tua kata, noh rasa akang jo Endi pe ayang tua pe pukulan!!” Om kalo so pukul-pukul depe telapak tangan deng pulungku saking dia pe simore.

“Ngana ada pake doi darimana dang Kalo kasiang ada bataruh? Sedangkan Keke pe doi skolah mar nda war bayar”? Tanta Onya bahaga curiga pa depe laki. Om Kalo manyao sambil tersipu-sipu malo rupa pranggang dapa riki ba-tona’;

“Lena so datang antar tu doi arisan, ngana kata yang dapa cabu, mar ta so nda bilang...”

“Apaaaaaaaaaaaa??????!!!..Adoh untung Kalo ngana nda kalah bataruh, brani ngana kalah kong kita dapa tau ngana so pake bajudi kita pe doi arisan, kita kabiri kwa pa ngana!!!” Tanta Onya ba-ancam stengah emosi. Om Kalo langsung susut dapa lia tanta Onya so ganas bagitu.

“Onya, Tuhan sayang kwa pa torang, Dia tau tu doi arisan nda cukup mop bayar Keke pe biaya skolah, jadi dapa tambah jo kamari..” Om Kalo bakomi-komi cari alasan. Ternyata tanta Onya yang so langsung silau dapa dengar tu doi 4 juta mo pegang, langsung bekeng lupa depe marah pa depe laki.

‘’ Adoh Kalo, ini berkat dari Tuhan…torang dalam kesulitan, mar Tuhan kase jalang biar kurang lewat kupon Singapur. ‘’ tanta Onya terharu skali, dalam hati dia so mulai jaga bapikir ; ‘daging Ba’ 2 kilo, ayang 2 ekor, jangan lupa bili lalampa kesukaan om Kalo’ dll sebagainya….

Abis om Kalo trima doi 4 juta dari bataruh ayang, tanta Onya langsung bayar utang di warong pa tanta Reni, deng kase Keke pe doi skolah for 6 bulan punya. Tanta Onya pe sanang bukan kepalang memang, pikir jo saat nyanda ada doi sama skali, kong 4 juta datang rupa cuma ada jatung dari langit, itu bukang luar biasa ?

Depe hari senin, tanta Onya so bakira-kira mo pigi ka pasar 45. Bulan lalu dia ada dapa lia kalung mas pe cantik skali, dia mo suka skali bili tu kalung, mar nyanda ada doi. Skarang dia so ada doi, jadi dia mo pigi bili itu kalung.

Hari rabu pagi, tanta Onya so siap-siap mo ka bendar, dia so bapasang pa om Kalo kalo dia mo pulang sadiki terlambat, jadi tak usah jo kata mo tunggu pa dia for makang siang. Dengan hati yang babunga-bunga, tanta Onya dola oto mikro, tujuan pusat kota.

Om Kalo baru saja abis mandi kong mo maso ka kamar waktu dia dapa dengar suara orang manangis. Om Kalo coba tanang talinga supaya dapa dengar lebe jelas, ternyata tu suara datang dari dalam dia deng tanta Onya pe kamar tidur.

’Hah ?! Onya so pulang dari bendar ?!!’ om Kalo batanya herang dalam hati. Palang-palang dia buka pintu kamar, ternyata butul itu tanta Onya. Dia ada sementara

manangis bapalaka di atas tampa tidor.

“ Onya...kiapa ngana ?!! “ palang-palang om Kalo batanya pa depe maitua yang kelihatan rupa anak paranggang baru putus cinta, manangis bapalaka di tampa tidor.

“ Adoh Kalo…kita mo minta maaf pa ngana, kita ini eh pe soe skali !! “ tanta Onya lebe tahela-hela manangis.

“ Kiapa kong ngana bilang bagitu, dang ?! “

“ Itu doi yang ngana da kase pa kita, orang pancuri di pasar 45 !!! “

Om Kalo bahela napas panjang, ternyata doi yang datang capat nyanda lewat suar lalah rupa yang Tuhan so tetapkan, mo anyor rupa stau!!

Paris, 23 Février 2002