Popular posts

nsikome On 28 Mei 2011

Hi semua, ketemu lagi...udah lama banget ya. Aku akhir2 ini sibuk banget, banyak kerjaan dan nggak punya waktu buat ngedit..kali aku ini mau posting dulu mini seri aku yang ditulis pake dialek Manado. Miniseri ini ada 8 seri, dan kutulis waktu tahun 2002. Bagi yang nggak ngerti, nggak apa-apa, aku mau posting yg lain juga kok, pake bahasa indonesia...Selamat menikmati ya...



DI IBADAH KOLOM


‘’ Onyaaaaaaaa !!!!! ‘’ dapa dengar Om Kalo pe suara rupa tu Tarzan ilang tali mamudu bapangge pa dia pe bini sayang-sayang. Biar kasiang tu umur perkawinan somo bajalang 20 taong, Om Kalo nyanda pernah pake tu istilah, ‘taong pertama kaweng, maitua tasangko di batu, paitua skop tu batu kong bilang “sapa ini ley so nyanda ada karja taruh batu di tengah jalang ? awas ta dapa pa dia itu !!”. Taong kalima kaweng, maitua tasangko di akar pohong, paitua cuma tengo kong basuara ; “bae-bae kasiang bajalang, banyak pohon basar memang di sini ! “. Taong ka spuluh perkawinan, maitua tasangko nentau di apa stou kong langsung jatung ka tanah, paitua langsung toreba ; “Ngana ini coba kwa’ kalo mo bajalang pake mata sadiki !! “. Nyanda ada di kamus Om Kalo tu kalakuang bagitu. Maklumlah, dulu waktu masa² batunangan, susah skali Om Kalo da dapa pa Tanta Onya. Soalnya, Tanta Onya itu termasuk primadona kampung, tambah lagi tanta Onya pe sebe pe jaha rupa tu anjing Helder pa dorang pe birman di sabalah. Pokoknya, kalo mo inga tu dulu-dulu, Om Kalo cuma jaga tatawa sandiri. Depe perjuangan dalam merebut tanta Onya pe hati memang luar biasa. Sampe² om Kalo pernah rako pa om Utu, depe saingan berat waktu itu. Mar itu dulu waktu masih muda. Skarang om Utu so kaweng, so ada anak. Dorang dua deng om Kalo batamang dekat sampe detik ini. Rupa skarang, om Kalo sementara ada tunggu pa om Utu for mo pigi ka ibadah kolom pa dorang om Hans pe rumah. Om Utu kwa’ ada janji mo singgah pa dia.
“ Kiapa ley kasiang ngana Kalo, babataria rupa tu tukang jual ikang melek ?! “ tanta Onya kelihatan kurang sanang.
“ Ngana ini eh Onya kita nyanda abis herang, tiap kali basaleng baju, deng jam-jam ngana baforo di muka cermin, kaluar kamari masih tetap Onya. So deng jiwa raga ada ba meikep, takira ley kong kaluar kamari so jadi rupa Tamara Bleki itu parampuang pe fasung di sinetron ! “ om Kalo stengah baterek pa tanta Onya.
“ Hi dodo’ ngana ini Kalo, asal-asal cumu ngana orang pe fam, nanti dorang tuntut di muka pengadilan baru kapo’ ! depe nama Tamara Blezinsky bukang Bleki, susah jo memang ngana ini kuno, nyanda jaga bauni tu sinetron !! “
“ Biar jo kasana ngana bilang kita ini kuno, tambah tu artis-artis nentau ada kerasukan opo lokon stou kong pake nama stengah mati mo cumu ! ngana ini kalo so klaar tempel² tu kueku di pongo-pongo, marijo torang somo pigi ka ibadah kolom, jang rupa minggu lalu waktu sampe, tu tuang rumah so sementara bajalang kukis ! “
“ Ah, ngana ini mo stel cari alasan ley Kalo ! ngana sandiri yang sengaja mo baterlambat lantaran so tau kalo yang mo pimpin ibadah om Arnol ! “ tanta Onya pe kata-kata langsung bekeng depe paitua so nyanda bisa berkutik. Om Kalo memang pastiu kalo Om Arnol yang pimpin ibadah, soalnya tu syamas satu itu kalo bekeng khotbah depe panjang lawang-lawang Suharto pe pidato 17 agustus. Pernah satu kali om Kalo riki tamudung lantaran nyanda sadar so tasono waktu om Arnol ada sementara pimpin doa syafaat. Om Kalo pe malo deng marah waktu itu memang sampe di solop. Bekeng lebe om Kalo pastiu, itu om Arnol pe doa syafaat depe panjang 2 x 45 menit kalo mo kase pisah deng depe bahela napas, lawang² menit bolakaki kwa’ memang !!
“ Hush !! palang-palang sadiki kalo mo bicara Onya, birman do’en riki somo dapa dengar ?! “ ternyata om Kalo katu’ tako birman dengar dia nyanda suka pa om Arnol pe khotbah. “ Marijo torang barangkat ! “ om Kalo langsung tarek depe bini pe tangan.
“ Kita pe kira ngana ada janji pa Utu mo tunggu pa dia ? “ tanta Onya herang batanya.
“ Biarakang jo kasana pa Utu itu, dia da bilang mo singgah kamari jam 7, ini so jam 7 lewat dia bulum muncul-muncul ! “
“ Terserah pa ngana noh, kalo ngana so suka mo pigi, marijo dang ! “
Torang pe om Kalo deng Tanta Onya langsung kaluar pintu rumah. Biasanya dorang salalu pigi kolom dengan Keke dorang pe anak semata wayang yang rupa anak² muda skarang pe istilah, baru mo bartumbuh taji alias umur² ABG ( anak baru gode’ eh gede !! ). Cuma berhubung Keke hari ini ada pigi balajar pa depe tamang pe rumah, cuma dorang dua laki-bini yang pigi ibadah.
Sampe pa om Hans pe rumah, ternyata so banyak orang di sana. Tu tampa duduk yang tuang rumah ada sadia akang amper fol. Om Kalo tatawa dalam hati, dia memang so bakira² kalo hari ini akang banyak orang yang datang.
“ Ngana lia jo Onya, kong sadiki jo tu manusia ni hari. Tau jo bukang, ibadah pa om Hans pe rumah, sapa dulu….! “ om Kalo babise pa tanta Onya pe talinga.
“ Hush, ngana ini eh pe mulu batata skali, kiapa so kalo banyak orang datang di sini ? “
“ Eh Onya, ngana do’ rupa tu nentau-nentau jo, biasa…dorang tau tanta Els tukang bekeng kukis sadap, makanya tiap kali ibadah di sini, salalu banyak tu kapala² pamalas muncul lantaran kukis. “
“ Kalo, ngana ini nembole berenti curiga sadiki ? ngana mo pi tau so kalo dorang datang lantaran kukis ato lantaran Tuhan ? “ tanta Onya so mulai pastiu deng om Kalo yang tinggal ada ba ober nyanda berenti.
“ Huss…badiang jo Onya, tu ibadah somo mulai ! “ om Kalo kase mata basar pa depe bini. Tanta Onya pe napsu so sampe di gargantang, om Kalo yang dari tadi nyanda stop angka cirita, ini dia bastel kase mata manyala rupa tu tanta Onya yang dari tadi tinggal ada ba pek-pek nyanda stop. ‘Awas ngana sampe di rumah sabantar’, tanta Onya bilang dalam hati. ‘Ta suruh tidor deng Brino di luar kwa’ pa ngana !!’.
Sementara doa pembukaan, om Utu muncul deng tanta Lena depe maitua. Dorang dua langsung dudu di dekat pa tanta Onya deng om Kalo, kebetulan masih ada 1 stengah tampa dudu di bangku itu. Sebenarnya boleh for dua orang, mar berhubung tanta Lena agak berukuran ‘Extra Large’, terpaksa tanta Lena cuma badudu stengah panta.
‘’ Uff…sorry Lo kita terlambat sadiki ! “ om Utu babise pa om Kalo
“ Makanya kita so nyanda tunggu pa ngana, Tu. Kiapa terlambat ?! “ tanya om Kalo balas babise.
“ Biasa…maitua pe smengken ilang, terpaksa musti bakutulung cari. “
“ Dasar memang parampuang, kang ? kita ley tadi kurang da stengah paksa pa Onya baru dia baangka dari muka cermin ! “
“ Hey !! coba badiang sadiki ngoni dua, ibadah blum klaar re’en !! “ tanta Lena batoreba, soalnya tu laki² dua itu lama² so nyanda bakubise, mar so jaga bacirita biasa. Om Utu deng om Kalo langsung tutu mulu. Om Utu sandiri tako basuara lebe, sebab terakhir kali dia manyao pa tanta Lena, tapis-tapis kalapa yang malayang pa depe kapala. Depe maitua itu memang panjaha, deng om Utu juga termasuk anggota ISTI ( ikatan suami takut istri ). Ibadah berjalan dengan khidmat sampe selesai. Om Kalo nyanda tasono, sebab kali ini bukang om Arnol yang pimpin, mar om Epo, dorang pe penatua. Waktu tuang rumah sementara ada bajalang kukis deng teh, om Kalo pe mata langsung tabuka lebar-lebar. Sebenarnya tadi dia memang so agak manganto sadiki, untung om Epo pe khotbah nyanda panjang-panjang. Om Kalo pe mata memang langsung tabuka lantaran dapa lia tu kukis lalampa depe kesukaan. Bukan sambarang kukis lalampa, mar lalampa made in tanta Els. Kalo lalampa orang laeng yang bekeng, om Kalo tolak. Tanta Els memang terkenal jago bekeng kukis sadap. Depe produk terkenal sampe luar daerah. Mar tanta Els tetap cuma suka jual di dalam kota depe kukis-kukis. Yang paling om Kalo suka, tanta Els pe lalampa memang laeng daripada yang laeng. Baik depe rasa maupun depe cara bakar. Berhubung tanta Els pe kukis so terkenal deng laris terjual, depe harga jadi agak-agak mahal. Mar tetap saja tiap hari minggu om Kalo salalu suruh pa Keke pigi beli for bekeng tamang minum kopi pagi-pagi biar cuma 10 biji lalampa.
Waktu giliran om Kalo, nya’ pake malo² dia langsung ambe 4 lalampa kong taruh pa dia pe piring. Tanta Onya pe biji mata riki amper balumpa kaluar dapa lia om Kalo ambe 4 biji tu kukis.
‘’ Eii Kalo, ngana ini eh bekeng malo jo, kong sadiki jo itu kukis ngana da ambe ! ‘’ protes tanta Onya lantaran so malo.
‘’ Onya kasiang, ibadah kolom di sini nanti ulang 6 bulan datang, mo dapa lalampa gratis bagini musti tunggu lama ley ! “ om Kalo nyanda farek deng depe bini pe protes. Tanta Onya langsung badiang dapa lia depe laki pe model. Memang kalo perkara lalampa-nya tanta Els, nyanda ada guna dia mo buka suara. Depe laki itu masuk kategori ‘pemadat’ kukis lalampa. Kalo mo dipikir-pikir, lebe bagus depe laki yang cuma jadi ‘pemadat’ kukis lalampa, daripada rupa om Kale, tanta Mina pe laki yang madat captikus kong tiap malam pinjam got di muka pa dorang oma Nona pe rumah.
Setelah samua so klaar, banyak yang mulai permisi pulang, termasuk om Utu deng tanta Lena. Dorang dua memang mo bacapat, lantaran Ungke cuma sandiri di rumah ( Ungke itu dorang dua pe anak terakhir umur sama deng Keke, dorang pangge sayang-sayang Ungke lantaran tanta Lena orang Sanger dari Tamako, om Utu sandiri dia orang Langowan atas. )
‘’ eh Kalo, Onya, somo kamuka re’en torang dua, neh ?! “ om Utu pamitan pa tanta Onya deng om Kalo, sambil baangka badiri.
“ Eh iyo dang kalo bagitu, jang lupa ibadah kaum bapa lusa neh Utu !! ‘’ om Kalo manyao pa om Utu.
“ Yo’i…don’t worry, Lo !! “ om Utu sok ber-Inggris ria, maklumlah dulu dia kan bekas guide. Om Utu deng tanta Lena lalu mulai bajalang ka pintu keluar. Tiba-tiba dapa dengar om Kalo bataria,
“ Utu, ngana pe kidung jemaat tatinggal di sini ! “ om Kalo lalu baangka capat-capat dari bangku for mo kase om Utu pe kidung jemaat. Baru dia sampe di tengah ruang tamu-nya om Hans & tanta Els, mendadak dari dalam om Kalo pe kaki calana panjang kaluar 8 biji kukis lalampa. Om Kalo pe muka langsung pucat rupa topong trigu, samua mata terarah pa om Kalo, ada yang sinis, ada yang tangisi-ngisi dapa lia om Kalo pe model. Tanta Onya sandiri pe muka ikut-ikutan jadi pucat. Dorang dua laki bini tanpa ba-bi-bu langsung permisi pulang.
Sementara ada bajalang di jalan, om Kalo buka suara,
‘’ Pe soe skali kita lupa kalo calana panjang ini pe popoji samua so lobang ! ‘’
‘’ Itu kwa’ ngana pe talimburang Kalo ! ‘’ tanta Onya menyalahkan om Kalo.
“ Mar ngomong-ngomong Onya, kiapa itu lalampa ada 8, sedangkan kita tau cuma 4 yang kita da taruh di dalam popoji ?!!!!
Tanta Onya pe muka langsung bersemu merah rupa baru abis ofu tikang…….


Paris, 21 FĂ©vrier 2002

Nantikan kisah keluarga om Kalo deng tanta Onya berikutnya…

{ 4 komentar... read them below or Comment }

  1. om deng tanta sama jo kote... hahahaha......

    BalasHapus
  2. Hahahahaha....sam-sama Golojo Lalampa...

    BalasHapus
  3. Sandi Tamansa31 Mei 2011 11.54

    kalah2 le Jeylend...:))

    BalasHapus
  4. Sandi : awas ngana neh...kita pe ade itu :(

    BalasHapus

__________________________________

Hit Counter

Histats

Guestbook

Pages

Like This Theme

Diberdayakan oleh Blogger.

Followers